Քննարկվել են կուսակցությունների ֆինանսավորման ոլորտում առկա օրենսդրական լուծումները, կուսակցություններին տրամադրվող նպատակային ֆինանսավորման չափորոշիչներն ու հիմնավորումները, ինչպես նաև կուսակցությունների ֆինանսական գործունեության թափանցիկության նկատմամբ վերահսկողական գործառույթների եւ մեխանիզմների հստակեցումները։   Օրակարգի երկրորդ հարցի շրջանակում ներկայացվել են ՏՀԶԿ-ի գնահատման 5-րդ փուլի շրջանակներում կատարողականի գնահատման չափանիշներն ու արձանագրված առաջընթացը հակակոռուպցիոն քաղաքականության, շահերի բախման ու հայտարարագրման, ազդարարների պաշտպանության, գործարար բարեվարքության, դատական համակարգի անկախության, դատախազական համակարգի անկախության, հակակոռուպցիոն մարմինների և կոռուպցիոն հանցագործությունների քննության ուղղությամբ:   Զեկուցվել է նաև ԳՐԵԿՈ-ի Հայաստանի գնահատման 5-րդ փուլի շրջանակներում առկա հանձնառությունների ուղղությամբ տարվող աշխատանքների վերաբերյալ: Զեկույցների վերաբերյալ խորհրդի անդամները ներկայացրել են իրենց դիտարկումներն առաջարկվող լուծումների վերաբերյալ, մտքեր են փոխանակվել հանձնառությունների կատարման ընթացակարգերի շուրջ:   Ամփոփելով՝ վարչապետ Փաշինյանը հանձնարարել է զեկույցների ընթացքում վեր հանված խնդիրների ուղղությամբ շարունակել աշխատանքները և հաջորդ նիստին ներկայացնել կոնկրետ առաջարկություններ:

Վարչապետ Նիկոլ Փաշինյանի գլխավորությամբ տեղի է ունեցել Հակակոռուպցիոն քաղաքականության խորհրդի արտագնա նիստ: Օրակարգային առաջին հարցով քննարկվել են ՏԻՄ ընտրախախտումների վերաբերյալ «Անկախ դիտորդ» դաշինքի և «Ականատես» դիտորդական առաքելության կողմից վեր հանված խնդիրները, ընտրական հանցագործությունների քննության ընթացքը: Անդրադարձ է կատարվել օրինականության նկատմամբ վերահսկողության մակարդակի բարձրացմանը, ընտրակաշառքի դեպքերի բացահայտմանը, ընտրախախտումների կանխարգելմանն ուղղված քայլերին, կուսակցությունների ֆինանսավորման մեխանիզմներին, ընտրական ծախսերի թափանցիկության ապահովմանը: Վերոնշյալ հարցերի ուղղությամբ կարևորվել է ընտրակաշառքի պատճառահետևանքային կապերի վերհանումը, վարչական ռեսուրսի հստակ սահմանումն ու կուսակցությունների ֆինանսավորման ստանդարտի սահմանումը: Օրակարգի երկրորդ հարցը վերաբերել է գնումների ոլորտում քրեական գործերի ընթացքին: Տեղեկատվություն է տրամադրվել կայացվող որոշումների վերաբերյալ` ի ապահովում թափանցիկության: Խորհրդի անդամներն անդրադարձել են պետական գնումների կարգավորումներին, Պետական վերահսկողական ծառայության վերահսկողական գործողություններին, հանրային վերահսկողության մեխանիզմներին, լրացուցիչ լծակների նախատեսմանը, ձևաչափերին, գնումների գործընթացում կարողությունների զարգացմանը: Հաջորդիվ ներկայացվել են կոռուպցիոն բնույթի քրեական գործերի քննության և ապօրինի ծագում ունեցող գույքի բռնագանձման ուղղություններով կատարված աշխատանքները: Գլխավոր դատախազ Աննա Վարդապետյանը տեղեկացրել է, որ 2024 թվականի ընթացքում կոռուպցիոն բնույթի ավարտված քրեական վարույթներով պատճառվել է 8 մլրդ 20 մլն դրամի գույքային վնաս: Վերականգնվել է 1 մլրդ 163 մլն 514 հազար դրամ գույքային վնաս: Ապօրինի ծագում ունեցող գույքի բռնագանձման հետ կապված եղել է 152 հայցադիմում՝ Հակակոռուպցիոն դատարանի վարույթում: Արգելանք է դրված՝ շուրջ 1500 անշարժ գույքի, 290 շարժական գույքի, 400 իրավաբանական անձում մասնակցության իրավունքի, 540 մլրդ դրամական միջոցի վրա: Ընդհանուր հայցագինը կազմում է շուրջ 600 մլրդ դրամ: Կայացվել է 5 դատական ակտ, կնքվել է հաշտության 8 համաձայնություն: Հաշտության համաձայնություններով Հայաստանի Հանրապետությանն է փոխանցվել 7 անշարժ գույք, 2 շարժական գույք, 2025 թվականի հունիսի 3-ի դրությամբ` 815 մլն 200 hազար դրամ և 50 հազար 720 եվրո: Օրինական ուժի մեջ է մտել 1 դատական ակտ: Տեղեկացվել է, որ պետական (համայնքային) շահերի պաշտպանության ուղղությամբ 2024 թվականի ընթացքում կայացված դատական ակտերով փաստացի վերականգնվել է շուրջ 2 մլրդ 785 մլն դրամ կամ 7 մլն 69 հազար դոլար: 2024-ին դատախազների կողմից ներկայացված հայցերով Հայաստանի Հանրապետության կամ համայնքի սեփականության իրավունքն է գրանցվել շուրջ 2 մլրդ 785 մլն 511 հազար դրամ շուկայականին մոտարկված կադաստրային արժեքով 18 միավոր անշարժ գույքի նկատմամբ: 2024 թ. ընթացքում դատախազական ակտերի հիման վրա պետությանը և համայնքներին վերադարձված գույքերի ընդհանուր արժեքը կազմում է 107 մլն 341 հազար դրամ: Օրինական ուժի մեջ մտած դատական ակտերով բավարարվել է 43 հայցապահանջ՝ 207 մլն դրամի: 2025 թ. առաջին կիսամյակի ընթացքում Հայաստանի Հանրապետության սեփականության իրավունքն է վերականգնվել 7 գույքի նկատմամբ: Շուկայականին մոտարկված կադաստրային արժեքը կազմել է 3 մլրդ 365 մլն դրամ: 2025 թ. առաջին կիսամյակի ընթացքում համայնքների սեփականության իրավունքն է վերականգնվել 4 գույքի նկատմամբ: Շուկայականին մոտարկված կադաստրային արժեքը կազմում է 275 մլն դրամ: 2025-ի առաջին կիսամյակի ընթացքում բավարարված հայցերով հօգուտ Հայաստանի Հանրապետության բռնագանձվել է 218 մլն դրամ: Նույն ժամանակահատվածում դատախազական ակտերի հիման վրա համայնքներին են վերադարձվել՝ Խաշթառակ բնակավայրի մանկապարտեզի մասնաշենքը, Դիլիջան համայնքի մանկապարտեզի մասնաշենքը, Մարտունի համայնքի մարզադաշտը: Տեղեկացվել է նաև, որ Զինվորական դատախազությունը պետական շահերի պաշտպանության լիազորության շրջանակում վերականգնել է 11մլն 310 հազար դոլարին համարժեք 4 մլրդ 462 մլն 706 հազար դրամ: Կառավարության որոշմամբ ստեղծված Վերականգնված միջոցների միասնական հաշվին ստեղծման օրվանից՝ 2024 թվականի դեկտեմբերի 5-ից առ այսօր, մուտք է եղել 17 մլրդ 167 մլն դրամ: Օրակարգի վերջին հարցով ներկայացվել են Ազդարարման համակարգի զարգացման ոլորտում կատարված աշխատանքները և առկա խնդիրները: Արդարադատության նախարար Սրբուհի Գալյանը նշել է, որ Ազդարարման համակարգի կատարելագործման ուղղությամբ իրականացված աշխատանքների արդյունքում վերջին շրջանում աճել է ազդարարումների թիվը: Մասնավորապես, տեղեկացվել է, որ 2021 թվականին ազդարարման թիվը եղել է 75, 2022 և 2023 թթ.-ին` 116-ական, 2024-ին` 380, իսկ 2025-ի առաջին կիսամյակում արդեն իսկ այդ թիվը հասել է 282-ի: Ըստ պատասխանատուների, Ազդարարման համակարգի կատարելագործման գործում հաշվի է առնվում նաև միջազգային փորձը, անանունության և անվտանգության երաշխիքների կատարելագործումը: Ներկայացվել են նաև համակարգի զարգացմանն ուղղված առաջարկություններ: Ամփոփելով` վարչապետ Փաշինյանը հանձնարարել է խորհրդի նիստում քննարկված և բարձրացված խնդիրների շուրջ շարունակել քննարկումները և դրանց լուծման քայլերը ներկայացնել հաջորդ նիստում:

Վարչապետ Նիկոլ Փաշինյանի գլխավորությամբ տեղի է ունեցել Հակակոռուպցիոն քաղաքականության խորհրդի հերթական նիստը, որում ներկայացվել է 2023-2026 թվականների Հակակոռուպցիոն ռազմավարության նախագիծը: Նիստին մասնակցել են օրենսդիր, գործադիր, դատական համակարգերի, ինչպես նաև քաղաքացիական հասարակության և այլ մարմինների ներկայացուցիչներ: Քննարկվել է 2023-2026 թվականների Հակակոռուպցիոն ռազմավարության նախագիծը, որի նպատակը հակակոռուպցիոն բարեփոխումների շարունակականության ապահովումն է և բխում է Կառավարության՝ 2021-2026 թվականների գործունեության միջոցառումների ծրագրից: Ներկայացվել են ռազմավարության նպատակները, որոնց թվում են՝ կոռուպցիայի կանխարգելումը և բարեվարքության համակարգի ամրապնդումը, կոռուպցիայի հակազդման իրավական և ինստիտուցիոնալ համակարգերի կատարելագործումը, հակակոռուպցիոն կրթության և հանրային իրազեկման կառուցակարգերի կատարելագործումը, գործարար բարեվարքության, իրավունքների պաշտպանության, պետություն-բիզնես վարչարարության դյուրացումը, հակակոռուպցիոն մոնիթորինգի և գնահատման համակարգերի կատարելագործումը: Նախագծի շուրջ ծավալվել է մտքերի փոխանակություն, հակակոռուպցիոն հիմնական ուղղությունների վերաբերյալ ներկայացվել են առաջարկություններ և դիտարկումներ:Ընդգծելով, որ հակակոռուպցիոն ռազմավարությունն արտացոլում է Կառավարության ծրագրում ընդգրկված կոռուպցիայի դեմ պայքարի հիմնական ուղղությունները, Նիկոլ Փաշինյանը կարևորել է կոռուպցիոն խնդիրների հետևողական վերհանումը և լուծումը, կոռուպցիայի կանխարգելման ուղղությամբ աշխատանքները, ինչպես նաև հանձնարարել նիստի ընթացքում վեր հանված հարցերի շուրջ անցկացնել աշխատանքային քննարկումներ և առաջարկել լուծումներ:

Վարչապետ Նիկոլ Փաշինյանի գլխավորությամբ Ջերմուկում տեղի է ունեցել Հակակառուպցիոն քաղաքականության խորհրդի հերթական նիստը: Նիստին մասնակցել են օրենսդիր, գործադիր, դատական համակարգերի, ինչպես նաև Քաղաքացիական հասարակության և այլ մարմինների ներկայացուցիչներ: Անցնելով օրակարգային հարցերին, նախ անդրադարձ է կատարվել կոռուպցիայի կանխարգելման ներկա իրավիճակին և զարգացման հեռանկարներին: Մասնավորապես, քննարկվել են հայտարարագրման համակարգին, կուսակցությունների ֆինանսական վերահսկողությանը, հակակառուպցիոն կրթությանը վերաբերող հարցեր: Նշվել է, որ հայտարարագրման համակարգը տվել է դրական արդյունքներ վերահսկողության առումով: Համակարգի զարգացման ուղղությամբ արդեն իսկ ներդրվել է էլեկտրոնային նոր համակարգ, որով էլ այս տարի պաշտոնատար և նրանց փոխկապակցված անձինք լրացնելու են հայտարարագրերը: Տվյալ համակարգում արդեն իսկ ներբեռված են մի շարք տվյալներ և հնարավորություն է տալու առավել պարզ եղանակով լրացնել հայտարարագրերը: Համակարգն ունենալու է տեղեկատվությունը ներբեռնելու հնարավորություն և իրականացնելու ինքնուրույն վերլուծություն: Նշվել է, որ նախորդ տարվա ընթացքում Կոռուպցիայի կանխարգելման հանձնաժողովի կողմից էապես ավելացել են հայտարարգրերի վերլուծության ծավալները` ռիսկային ցուցանիշների հիման վրա: 2020 թվականի համեմատ նախորդ տարի Գլխավոր դատախազություն առավել քիչ թվով գործեր են ուղարկվել, սակայն ավելացել են վարչական վարույթները: Նշվել է, որ հանձնաժողովի գործունեությունը և հայտարարագրման համակարգը շարունակաբար բարելավելու նպատակով անհրաժեշտ են օրենսդրական նոր փոփոխություններ: Կուսակցությունների ֆինանսական վերահսկողության և հաշվետվողականության մակարդակի բարձրացման ոլորտում ներդրվել են կոռուպցիան կանխարգելող մեխանիզմներ: Կարևորվել է հակակառուպցիոն կրթության ուղղությամբ իրականացվող և առաջիկայում նախատեսվող ծրագրերը: Պատասխանատուները նշել են, որ հակակառուպցիոն կրթության ծրագրեր են ներդրվելու նախակրթարաններից մինչև բուհական համակարգ: Միաժամանակ, ներկայումս ընթացքի մեջ է Հակակոռուպցիոն նոր ռազմավարության մշակման գործընթացը: Հաջորդիվ անդրադարձ է կատարվել բարեվարքության ուսումնասիրություններին, հանրային ծառայությունում շահերի բախման, վարքագծի կանոնների, անհամատեղելիության, նվերների ընդունման և բարեվարքության հետ կապված այլ հարցերի: Քննարկման առարկա են դարձել նաև կոռուպցիոն ռիսկերի գնահատման համակարգին, վերջինիս հնարավորություններին, առկա խնդիրներին և դրանց լուծման հեռանկարաներին առնչվող հարցեր: Ամփոփելով` վարչապետը կարևորել է հակակառուպցիոն ոլորտում իրականացվելիք նոր ծրագրերի, համակարգերի զարգացման ու օրենսդրական փոփոխությունների վերաբերյալ հանրային պատշաճ իրազեկման ապահովումը: «Այժմ մենք պետք է կենտրոնանանք Հակակառուպցիոն նոր ռազմավարության բովանդակության վրա: Այսօրվա նիստում հնչեցված առաջարկությունները պետք է դառնան ուղենիշ ռազմավարության համար: Հակակառուպցիոն քաղաքականության և կոռուպցիայի դեմ սկզբունքային պայքար մղելու մեր կառավարության հանձնառությունը և կամքը որևէ կերպ սասանված չէ անգամ մեկ մի միլիմետր»,- ընդգծել է վարչապետը` ավելացնելով, որ պետք է ունենալ հակակառուպցիոն հստակ ստանդարտներ: Միաժամանակ, Նիկոլ Փաշինյանը կարևորել է պատկան գերատեսչությունների կողմից մամուլում ներկայացված կոռուպցիոն բնույթի հրապարակումների վերաբերյալ պատշաճ հետաքննության իրականացումը: «Սա սկզբունքային հարց է, որևէ բան անարձագանք թողնել չի կարելի, պետք է գնանք մինչև վերջ և արդյունքների մասին հանրությանը տրամադրենք տեղեկատվություն»,- նշել է վարչապետը: Առանձնակի կարևորվել է նաև ազդարարման համակարգի վերաբերյալ քաղաքացիների շրջանում ակտիվ հանրային իրազեկման իրականացումը: «Ազդարարի ինստիտուտի զարգացմանը պետք է անպայման մեծ ուշադրություն դարձնել և այդ խնդիրը ներառել հակակառուպցիոն քաղաքականության նոր ռազմավարության մեջ»,- շեշտել է վարչապետ Փաշինյանը: