Վարչապետ Նիկոլ Փաշինյանի գլխավորությամբ տեղի է ունեցել Հակակոռուպցիոն քաղաքականության խորհրդի հերթական նիստը, որին մասնակցել են խորհրդի կազմում ընդգրկված պետական մարմինների ներկայացուցիչներ, ինչպես նաև հասարակական կազմակերպությունների ներկայացուցիչներ և հրավիրյալ մասնակիցներ։ Նիստի օրակարգի շրջանակում քննարկվել են գույքի, եկամուտների, շահերի և ծախսերի հայտարարագրման գործընթացին առնչվող խախտումների քննության ընթացքում միատեսակ մոտեցումների կիրառմանն ուղղված հարցեր, ինչպես նաև ընտրական գործընթացում հնարավոր կոռուպցիոն ռիսկերի կանխարգելմանն առնչվող մի շարք խնդիրներ։ Օրակարգի առաջին հարցի շրջանակում Կոռուպցիայի կանխարգելման հանձնաժողովի նախագահի պարտականությունները կատարող Մարիամ Գալստյանը ներկայացրել է, որ հայտարարագրման գործընթացին առնչվող իրավախախտումների կապակցությամբ վարչական և քրեական վարույթների ընթացքում ի հայտ են գալիս վարչաիրավական և քրեաիրավական բնույթի հանգամանքների տարբեր մեկնաբանություններ, ինչը կարող է ազդել իրավակիրառ պրակտիկայի միասնականության վրա։ Այդ համատեքստում ընդգծվել է հայտարարագրմանն առնչվող իրավախախտումների քննության իրավասություն ունեցող մարմինների՝ Կոռուպցիայի կանխարգելման հանձնաժողովի և Հակակոռուպցիոն կոմիտեի միջև փոխադարձաբար հաշվառվող և համադրված մեթոդաբանության ներդրման անհրաժեշտությունը։ Ներկայացվել է առաջարկ՝ ուժեղացնելու հայտարարագրման գործընթացի նկատմամբ վերահսկողության գործիքակազմը՝ ներառյալ խախտումների վերաբերյալ համապարփակ վերլուծության իրականացումը՝ նախաքննության նախաձեռման և արդյունավետ իրականացման նպատակով։ Քննարկման ընթացքում տեղի է ունեցել մտքերի փոխանակություն հայտարարագրմանն առնչվող խախտումների քննության ընթացքում ի հայտ եկող խնդիրների շուրջ՝ առանձնահատուկ շեշտադրելով վարչաիրավական և քրեաիրավական գնահատականների տարբեր մեկնաբանություններից խուսափելու անհրաժեշտությունը և միասնական իրավակիրառ պրակտիկայի ձևավորումը։ Վարչապետ Փաշինյանը կարևորել է հայտարարագրման գործընթացի նկատմամբ վերահսկողության շրջանակում Կոռուպցիայի կանխարգելման հանձնաժողովի կողմից իրականացվող վերլուծական աշխատանքի դերը՝ միաժամանակ ընդգծելով հակակշիռների և փոխզսպումների մեխանիզմների արդյունավետ գործարկման նշանակությունը։ Օրակարգի երկրորդ հարցի շրջանակում հասարակական կազմակերպությունների ներկայացուցիչները ներկայացրել են առաջարկություններ ընտրական գործընթացում առկա կոռուպցիոն ռիսկերի նվազեցման վերաբերյալ։ Մասնավորապես, առաջարկությունները վերաբերել են ընտրական ֆինանսավորման թափանցիկության բարձրացմանը, քվեարկության գործընթացի վերահսկողության մեխանիզմների կատարելագործմանը, ինչպես նաև ապօրինի ֆինանսավորման հնարավորությունների սահմանափակմանը։ Վարչապետը ընդգծել է ընտրական գործընթացի թափանցիկության ապահովման և օրենսդրությամբ սահմանված պահանջների լիարժեք պահպանման ուղղությամբ հետևողական քայլերի իրականացման կարևորությունը՝ հանձնարարելով շարունակել ներկայացված առաջարկությունների շուրջ քննարկումները և սեղմ ժամկետներում ներկայացնել առաջնահերթ լուծումներ պահանջող օրենսդրական և գործնական փոփոխությունների առաջարկներ։

Վարչապետ Նիկոլ Փաշինյանի գլխավորությամբ տեղի է ունեցել Հակակոռուպցիոն քաղաքականության խորհրդի նիստը, որին մասնակցել են նաև խորհրդի անդամ հասարակական կազմակերպությունների ներկայացուցիչներ, Հակակոռուպցիոն քաղաքականության խորհրդի հրավիրյալ մասնակիցներ: Օրակարգային հարցերի շրջանակում Արդարադատության նախարար, Հակակոռուպցիոն քաղաքականության խորհրդի անդամ Սրբուհի Գալյանը ներկայացրել է նախընտրական քարոզչության սահմանափակումների ուղեցույցը: Անդրադառնալով ուղեցույցի կառուցվածքին՝ մանրամասներ են ներկայացվել պաշտոնյաների և թեկնածուների նախընտրական քարոզչության մասնակցության կանոնների, իրավական պատասխանատվության միջոցների և այլ գործառույթների վերաբերյալ: Անդրադարձ է կատարվել կուսակցությունների ֆինանսավորման համակարգին, կուսակցությունների հաշվետվողականության, թափանցիկության ապահովմանը, իրավական պատասխանատվության միջոցներին, կուսակցություններում բարեվարքության մեխանիզմներին և այլ հարցերի։ Քննարկվել է «Կուսակցությունների մասին» սահմանադրական օրենքում փոփոխություններ և լրացումներ կատարելու մասին» սահմանադրական օրենքի և հարակից օրենքների նախագծերն և դրանցով առաջարկվող փոփոխությունները: Խորհրդի նիստի մասնակիցները հանդես են եկել իրենց դիտարկումներով և առաջարկություններով։ Վարչապետ Փաշինյանը նշել է՝ խնդիրը պետք է լինի հետևյալը, որ ոչ թե կանոններ սահմանվեն որպես թակարդներ, այլ կանոններ, որոնք կօգնեն կուսակցություններին գործել օրինական դաշտում։ «Կարծում եմ, որ այժմ ինչ քննարկում ենք, վերաբերում է կուսակցությունների բարեվարքության շրջանակին և դաշտին, և հետագայում «Կուսակցությունների մասին օրենքում» պետք է փոփոխություններ կատարվեն, օրենքով և կանոնադրություններով պետք է սահմանվի, որ կուսակցություններում լինեն մարմիններ կամ պաշտոնյաններ, որոնց վրա պատասխանատվություն դրվի դրանով զբաղվելու»,– ասել է Նիկոլ Փաշինյանը։ Երկրի ղեկավարը հավելել է՝ հակակոռուպցիոն քաղաքականությունների մշակման ճանապարհին եկել են այն եզրակացության, որ պետական կառավարման մարմիններում պետք է լինեն պաշտոնյաներ, ովքեր էթիկայի, բարեվարքության պատասխանատուներ կլինեն։ «Ինչի՞ համար դա արեցինք, որովհետև, այնուամենայնիվ, պետական կառավարման մարմիններում բոլորն իրենց գործերով զբաղված են, իսկ բարեվարքության կանոնի մասին հիշում ենք այն ժամանակ, երբ խախտում է արձանագրվում։ Նույն բանը տեղի է ունենում նաև կուսակցություններում։ Իմ առաջարկն այն է՝ մտածենք, օրենքում այնպիսի փոփոխություններ անենք, որ կուսակցության կանոնադրությամբ սահմանվի, որ կուսակցությունը պետք է ունենա անձ կամ մարմին, որը կզբաղվի կուսակցության բարեվարքության կանոններով, և այդ առումով գործընկեր էլ լինի Արդարադատության նախարարությունը, Կոռուպցիայի կանխարգելման հանձնաժողովը»,– ընդգծել է վարչապետը։ Նիկոլ Փաշինյանի խոսքով՝ իրենց խնդիրն այն չէ, որ կուսակցություններն անընդհատ խախտումներ անեն, իսկ մարմինները տուգանեն, գործեր հարուցեն։ «Մեր խնդիրն է՝ նպաստել, որպեսզի կուսակցությունները ծավալեն հնարավորինս քաղաքակիրթ գործունեություն, ինչը միշտ չէ, որ ստացվում է, և ես հավաստիացնում եմ, որ միշտ չէ, որ չարամտությունից է, որ կուսակցություններն ուզում են խախտումներ անել»,– նշել է երկրի ղեկավարը՝ կարևորելով նաև վերոնշյալ ուղղություններով համապատասխան իրազեկում կազմակերպելը։

Արդարադատության նախարար Սրբուհի Գալյանի գլխավորած պատվիրակությունը գտնվում է Կատարի Պետությունում:Նախարարը ելույթ է ունեցել Դոհայում՝ ՄԱԿ-ի Կոռուպցիայի դեմ կոնվենցիայի մասնակից պետությունների 11-րդ համաժողովին (CoSP11): Ընդգծելով, որ կոռուպցիայի դեմ պայքարը հանդիսանում է ՀՀ կառավարության առաջնահերթություններից մեկը, Սրբուհի Գալյանն անդրադարձել է հետևյալ թեմաներին`  2023–2026 թթ. հակակոռուպցիոն ռազմավարությանը և դրա հիմնական ուղղություններին, Ապօրինի ծագում ունեցող գույքի բռնագանձման ինստիտուտի ներդրմանը, Հակակոռուպցիոն մարմինների ստեղծմանն ու դրանց գործունեությանը, Կոնվենցիայի կիրարկման վերանայման մեխանիզմի (IRM) կարևորությանը և դրա գնահատման երկրորդ շրջափուլի շրջանակում ՀՀ կողմից իրականացված հակակոռուպցիոն բարեփոխումներին, Թափանցիկությանը և քաղաքացիական հասարակության հետ համագործակցության կարևորությանը, UNCAC Կոալիցիայի թափանցիկության հանձնառության ստորագրմանը:     

Արդարադատության նախարարությունն ու Կոռուպցիայի կանխարգելման հանձնաժողովը համատեղ անցկացրել են «Հակակոռուպցիոն ոլորտում 2025 թվականին իրականացված աշխատանքները և առաջիկա անելիքները» խորագրով համաժողովը:Համաժողովին բացման խոսքով է հանդես եկել Արդարադատության նախարար Սրբուհի Գալյանը, ով իր խոսքում նշել է՝ «Մենք հանձնառություն ունենք պայքարելու կոռուպցիայի դեմ և արդեն զգալի աշխատանք ենք իրականացրել»։Սրբուհի Գալյանը նշել է, որ այս և հաջորդող տարիների աշխատանքը նվիրված Է լինելու հակակոռուպցիոն ինստիտուցիոնալ մարմինների կարողությունների զարգացմանը, կուսակցությունների ֆինանսական գործունեության առավել թափանցիկ կառուցակարգեր սահմանելուն, ինչպես նաև ազդարարման համակարգը բարելավելուն:Կոռուպցիայի կանխարգելման հանձնաժողովի նախագահի պարտականությունները կատարող Մարիամ Գալստյանն անդրադարձել է Հանձնաժողովի կողմից կատարած աշխատանքին:Արդարադատության նախարարի տեղակալ Գևորգ Քոչարյանն ամփոփ ներկայացրել է հակակոռուպցիոն ոլորտում ընթացիկ տարում իրականացված աշխատանքը:Համաժողովին ներկայացվել է նաև Հակակոռուպցիոն մոնիթորինգի նոր հարթակը` որում ամփոփվելու է հակակոռուպցիոն քաղաքականության ոլորտում իրականացվող աշխատանքների, ինչպես նաև Հակակոռուպցիոն քաղաքականության խորհրդի գործունեության վերաբերյալ համապարփակ տեղեկատվությունը:Պանելային քննարկման շրջանակներում Հակակոռուպցիոն մասնագիտացված մարմինների ներկայացուցիչներն անդրադարձ են կատարել անցնող տարում ունեցած ձեռքբերումներին ու ներկայացրել են զարգացման հեռանկարները:Համաժողովի ավարտին ամփոփվել են Արդարադատության նախարարության և Կոռուպցիայի կանխարգելման հանձնաժողովի կողմից կազմակերպված «Կոռուպցիան իմ աչքերով» և «Բարեվարքության ճանապարհով» մրցույթների արդյունքները։

Կոռուպցիան սկսվում է փոքր քայլից:Մի´ գնա կոռուպցիայի ճանապարհով, ընտրի´ր արդարությունը: Այսօր կոռուպցիայի դեմ պայքարի միջազգային օրն է:#ոչկոռուպցիային

Կոռուպցիան սկսվում է փոքր քայլից:Մի´գնա կոռուպցիայի ճանապարհով, ընտրի´ր արդարությունը: Այսօր կոռուպցիայի դեմ պայքարի միջազգային օրն է:#ոչկոռուպցիային